146 من رافق الطيب شرب صافي المي

146


بيت القصيد 146
من رافق الطيب شرب صافي المي = ومن رافق الهافي جفا الما كفوفه
ولا تنكر المعروف لو أنه شوي = من قدم المعروف رد معروفه


يقول الشاعر سعد بن جدلان :

عطني ياهاب الريح من وقتك شوي = وأسمع كلامي كان ما به كلوفه
سخر جهودك في رضا الواحد الحي = والفرض لا تغفل من أول صفوفه
لا تمنع الناصح ليا قال ياخي = خذ ما يفيد وزايد الهرج طوفه
لا تطرد المقفي ولا تشاور العي = قدام ياكلك الندم والحسوفه
ترى حكيم الشور ياخذ ويعطي = نفسه من الراي الدناوي عيوفه
ولا تقرب الشبهه ولا تخاوي السي = عليك باللي طيبات وصوفه
من رافق الطيب شرب صافي المي = ومن رافق الهافي جفا الما كفوفه
ولا تنكر المعروف لو أنه شوي = من قدم المعروف رد معروفه
وأدمح خطا الطيب ليا صار مخطي = وأقبل معاذيره وقدر ظروفه
ولا تنهر المحتاج لا جاك مبلي = خسارة في فعل خير مخلوفه
وأطلق حجاجك لا أقبل الخاطر وحي = بشاشة الطيب كرامة ضيوفه
ترى الكريم معان بالخير مرهي = من يترك الماجوب جعله ذلوفه
لا تقطع الرفقه ولو حبلها لي = حبل الرفق من يفلته بان خوفه
رجل بلا ربعه من الناس مجفي = لا بد صكات الليالي تحوفه
واللي في عينه ما يشوف البشر شي = ترى البشر في عيونها ما تشوفه
ومن عوده حظه على بارد الفي = لا بد لفحات السمايم تلوفه
ومن ساقته نفسه على سكة الغي = صعب عليه ليا تمادى نكوفه
ترى الليالي تطوي أيامنا طي = يالله بحسن الخاتمه والمروفه


 

الوسوم:
جميع الحقوق محفوظة © 2016 الراوي – سالفة وقصيد.