32 الطبع غالب لتطبع كيف اغير مستحيل

Share

32


بيت القصيد 32
الطبع غالب لتطبع كيف اغير مستحيل = الناس طلعت للقمر ومطبله بطبولها 


هذه المحاوره من اشهر المحاورات للمسعودي والسواط .

المسعودي :

عيني تخيل أصحابها اللي حيث ما حلو تحيل = لدو لها ياسواط والا مابعد لدو لها
لو مات مفتون الهوا في ربة الطرف الكحيل = ما عاد يسمع كلمة المعروف لين اتقولها

ورد السواط :

أن خيلت عينك جميع أصحابها خلك ثقيل = والارض مترها وقيس عرضها من طولها
ان مات مفتون الهوا مايلتقى مثله مثيل = لا تحرق الطبخه ونكرها ونكره دولها 

المسعودي :

انته توصيني نسيت اني هذيلي من هذيل = الناس عارفها واخاطبها بقد اعقولها
عسى هذا يخبر هذا بكره محن اصحاب فيل = مير انت بينت الحقيقه قبل يمضي حولها

السواط :

أنا عتيبي من عتيبه من رياجيل الدليل = صورتك لن رحت المصور لايغرك زولها
الليله الليله نبي نكسيك بثياب النبيل = والشمـس تبدي والخبر يبدي ولو اتقولها

المسعودي :

رجلن يدس الما عن الضميان اقول انه بخيل = وارضي عليها الغيث يمطر ما تسيل اسيولها
لو كلت زاده مايخلص عنك يا تمر النخيل = والقوم ماتتعب على شوك الكداد اخيولها

السواط :

ما نشرب الا من زبيده جمها ماهو قليل = تشرب منه طليان بربر لو تهز اذيولها
اهل المغازي لان غزو ما تحتزم بام الجديل = يليت بعـض الناس ماكان ارسلت مرسولها

المسعودي :

اطلع ليا راس الجبل وانزل ليا بطن المسيل = وام الكباير لا تداني زينها بحثولها
الطبع غالب لتطبع كيف اغير مستحيل = الناس طلعت للقمر ومطبله بطبولها

السواط :

اطلع على سطح القمر ياطرقيٍ عابر سبيل = انته بفعلك والنشاما بينات افعولها
يا سايق الموتر علـى هونك ترا ليلك طويل = حاسب على سيارتك بطلوعها وانزولها


الوسوم:
جميع الحقوق محفوظة © الراوي – سالفة وقصيد.