الشاعر عبدالله بن رداس


الشاعر عبدالله بن رداس


قال الشاعر عبدالله بن رداس هذه القصيدة يرثاء فيها الأمير محمد بن سعود الكبير :

البارحة يوم أدبحن النجومي = أدنيت أنا الأوراق وسطرت الاسطار
وقامت قوافي الشعر حولي تحومي = مثل النحل حول الخليه الى طار
وذكرت انا ذاك الحصان العزمي = نسل الشيوخ اللي لهم صيت وأذكار
عليك يا محمد تزايد أهمومي = يابن سعود اللي لكم باع وأشبار
أزحول الرجال إن غيمن الغيومي = إلى غطا شمس الضحا عج واعصار
وان جاكم المضيوم راسه يحومي = يعود ميسور بعد هم وأعسار
مرحوم يا مير زكي السلومي = سعود قطاع الفيافي والاخطار
ياما انقطع في ساقته من ردومي = وياما جثت مع جرته قحص الامهار
ولكم مجالس تجتنبها الرخومي = مجالس إزحول القبائل هل الكار
وان ضاعت شيمات العرب واللزومي = توجد وسط ابيوتكم مثل الانوار
ولا قيل فيكم كبر ولا قيل زومي = ولا قيل فيكم غطلسه حقد واشرار
عربتم المنسب بطول الرجومي = ونقيتم النطقه عن الخبث والعار
كم واحدٍ جاني حزين الهمومي = أمصيبته تازن طميه وسنجار
يصيح وينخا مالقا اللي يقومي = مترك وشاكر يوم ضاعن الاشوار
وحملتهم لك وان جلا العمومي = اعتقتهم اعتك ربك من النار
ما قلتها ذاكر عطايا الكرومي = والله ما جاني ولا ربع دينار
وعن التسول صايمٍ ومحرومي = ما آذكر لحد منه من اكبار واصغار
وصلاة ربي عد حوت يعومي = وسيط البحر وعداد رشات الامطار
على محمد عد خلقٍ تصومي = وعداد حب الرمل واراق الاشجار


 

جميع الحقوق محفوظة © الراوي – سالفة وقصيد.