بدر بن عواد الحويفي


بدر بن عواد الحويفي
الاستاذ عبدالله بن رداس


هذه الابيات قالها بدر بن عواد الحويفي مخاطبًا بها الشاعر عبدالله بن رداس :

سلام ياللي سمعته ترفع الرأس = يا راعي اللزمه نزيه المبادي
اعني بها طلق الحجاج ابن رداس = عبد الله بالمعارف استادي
رجال متواضع وله راي نبراس = رأيه يدل اللي عن الدرب غادي
دنيا ودين وخف نابه وحساس = ومناهجه في كل حاله قصادي
ما يقبل الميله ولا هوب بلاس = يكرم على المنقود والانتقادي
رجل الحميه حاز طوله ونوماس = طبعه حليم وشرس من عند العنادي
واللي يبي ينفاء كلامي من الناس = يقبل ويقنع بالكلام الوكادي
أبو محمد جاره الله من الياس = من خيرة أهل الحاضره والبوادي
واجد رجال الجود مثله بالاجناس = اللي لهم بالطايلات انفرادي
والطيب ما هو بالتبختر والالباس = الطيب بالمنطق وفعل الأيادي
والجود له فرصة ثمينه ومقياس = ويقدر عليه اللي بجهدة يفادي
وأبو محمد له على الطيب مرماس = هو عزوتي والله عليه اعتمادي
من لابتن تشهد لهم قب الافراس = أهل النمش ومصقلات الهنادي
لهم على خيل المناحير مرواس = على ظهور معاصرات الطرادي
وإن جالهم من ديرة الخوف عساس = نشيرهم خاشر نشير المعادي
ما ساقوا الرتعه مخافه وسواس = قطعانهم ترعي الخطر ما تحادي
أفعالهم تعرف جدايد ودراس = قبل الصكوك اللي تمد الحدادي
قدام يشمخ ناب شلاع الاضراس = سبع السباع اللي تسيطر وسادي
عبد العزيز اللي بناء الفرع والساس = صقر تذري به صقور الهدادي
وخلي السباع الضارية مثل الابساس = بالعدل والتوحيد قاد الجهادي
على صناديد العداء بالقدم داس = وعن سنة المعصوم زال الفسادي
وانجب ميامين للاسلام حراس = منهجهم الدين الحنيفي وكادي
نفخر بهم بين الدول قول واحساس = ليا قام كل في زهيمه ينادي
ضد الخصيم اللي تغطرس تغطراس = عدوهم عينه تعاف الرقادي
أهل السيوف اللي بها قطع الانفاس = نصارة الإسلام في كل مادي
وتمت وصلوا عد ما هب نسناس = على الرسول اللي للاسلام هادي


 

جميع الحقوق محفوظة © 2016 الراوي – سالفة وقصيد.