فراج بن بويتل الجبلي


فراج بن بويتل الجبلي
من قبيلة مطير
الراوي منديل الفهيد


هذا الشاعر من شعراء قبيله (مطير) المشهورين … و قد اخترنا من شعره هذه القصيدة التي يشكر فيها قبيلة (الفغوم) لقيامهم مع ( الدوشان) في المعركة المعروفة بين (مطير ، و الصويط ) فيقول :

يا راكب من عندنا فوق ضبيان  =  واللي عليه (عبيد) حيثه سدادي
سواج بواج الخلا مثل سرحان  =  كلايفه من كل نوع اجدادي
ملفاك بيت بيّن كبر جمران  =  بيت مخومس للطراقى ينادي
عنده أيسره تلقى ذبايح من الضان  =  تحوفه اللي مثل ظبي الحمادي
وعند أيمنه مجلس نشامى وفتخان  =  ضياغم (يا عبيد) هرج وكادي
عونية يا (عبيد) بالكون فرسان  =  لا لبسوا جرد السبايا العوادي
(هايف) زبون اللي جذت يوم الاكوان  =  نطاح باللقوه وجيه المعادي
ولا نيب ناسي باللقا فعل (جفران)  =  فكاك بالضيقات حرد الايادي
واليا لفيت (سعود) مروى شبا الزان  =  اللي جعل كسبه لربعه نفادي
إلى نهض ينهض بريش وجنحان  =  في مخلبه ما يفرس الا الثنادي
يا ما قدى من جمعة وقت الاذان  =  لا قوضت بالكثر مثل الجرادي
جمع (الصويط) اللي لهم فعل وأفنان  =  خلى جنبهم مثل حذف الهوادي
سهج جنبهم والجنب فيه شجعان  =  خذا القضى بالشيخ (1) تسعة عوادي
ورع ضهر كنه سهيل الى بان  =  فعايله بالطيب ما له عدادي
ذكره وصل لديار مكة ونجران  =  تصبيحة العفنان صدق وكادي
(سعود) جاهم وأول الصبح ما بان =  تالي نهار وأول الليل عادي
عيال (الصويط) اللي على الخيل فرسان  =  تعوضت حريمهم بالحدادي
والفعل الاخر يوم جاهم (فنيسان) (2)  =  بالبدو واللي ظاهر من البلادي
(سعود) ناطح له جموع وفرسان  =  خلا القلايع ما عرف له عدادي


(1) الشيخ محمد الدويش ابو بدر الذي ذبحه الصويط .
(2) فنيسان : يقصد الشيخ راكان بن حثلين .

جميع الحقوق محفوظة © الراوي – سالفة وقصيد.