مقاطع من شعر الملك عبد العزيز آل سعود


مقاطع من شعر الملك عبد العزيز آل سعود
الراوي عبدالله بن دهيمش بن عبار


مقاطع من الشعر منسوبة لجلالة الملك عبد العزيز بن عبدالرحمن آل فيصل آل سعود طيب الله ثراه قال الملك عبد العزيز هذه الأبيات و هو يكافح لأسترجاع ملك الأباء و الأجداد بعد إعادة الرياض :

وهني الترف منسوع الجديله = ماضواه الليل دون مغرزاتي
وردناهن هيت وأخطاه الدليله = والموارد غير هيت مقضباتي
روحن مثل القطا صوب الثميله = ضمّرٍ تضفى عليهن العباتي
ما يطيب القلب ولا يبرد غليله = كود أشوف ركاب نجد معقلاتي
من تعبث بالفرايض عزتي له = تقعده حدب السيوف المرهفاتي

وقال الملك عبد العزيز هذه الأبيات وهو يكافح لتوحيد المملكة :

هجننا داجن على نجد وحمنه = والقطين نصبحه قبل الصلاتي
كنس العيرات راسي شيبنه = كل يوم مقبلات ومقفياتي
الكرى عفته عيوني حاربنه = ساهرٍ بالليل عيني ما تباتي
من طعن بالسيف جهده ما يكنه = وكان ذبن رديناهن للرماتي
قال محمد سبلوا وأرخوا الأعنه = واحتموا دون الركايب يا شفاتي
ما حلا ذب القفوش خلافهنه = بأمهات أصبع ودقس مطمساتي
أن ذبحنا الموت للصبيان سنه = وأن سلمنا سالمين من الشماتي

وقال الملك عبدالعزيز هذه الأبيات بعد توالي الأنتصارات :

نحمد المعبود خلاق البريه = مدني بالعز والنصر المبين
عز نجدٍ والحرم فرضٍ عليه = ملك جدي والجدود الأولين
من سلايل فيصل ما حنا نزيه = عقب تركي جامع دنيا ودين
تركي المشهور حماي الونيه = ساطي الحدين حده ما يلين


 

.
جميع الحقوق محفوظة © 2016 الراوي – سالفة وقصيد.