قصة وقصيدة الفارس سعود بن ذيب المطرفي

Share


قصة وقصيدة الفارس سعود بن ذيب المطرفي
الراوي عبدالله بن دهيمش بن عبار


أما الفارس سعود بن ذيب المطرفي فهو من أشجع الرجال ويقال أن صوته يرعب الخيل عندما يزعق عليها يرعجها فتزعج عيالها ومن الروايات التي تنسب لسعود بن ذيب روى لنا الراوي المعروف راضي البقيشي المطرفي فقال أن سعود كان عند أحد القبائل ولا يعرفون عنه شي وغارت على أبل القوم غاره فلحقوا ولا حالفهم الحظ بأسترجاع الأبل فذهب سعود بن ذيب بمفرده ورد الأبل ورمى بعض الفرسان وأخذ خيلهم فأصبح معروف وصار له قدر ومن قصص سعود بن ذيب يقال انه نزل على قبيلة بني خالد اثناء حكم الشيخ ابن عريعر وكان يتوق الى القهوه والتتن بحيث لم يجدهن فسمع صوت نجر اخر الليل وتوجه ناحيه الصوت ودخل البيت الذي يدق به النجر وعندما دخل وجد نفسه في منزل الشيخ ابن عريعر وهو عند زوجته فرحب به الشيخ ولم يتحشد منه لكونه غريب ومشتاق الى القهوه والتتن فامر العبد ان يقهويه ويعطيه كيس من التتن وبعد ان تقهوى وعمر سئل العبد فاخبره انه هذا الشيخ ابن عريعر فشعر بحرج شديد بسبب دخوله على الشيخ وهو في غير مجلس الرجال وقال هذه القصيدة يوضح قصته ويعرف بنفسه بحيث ان ابن عريعر يسمع عنه ولا شافه يقول سعود بن ذيب :

يا شيخ سامح زلتي طلعت سهيل = النجر جض وصوب حسه مشينا ‏
ياللي عيون اعداك ما تمرح الليل = من جود جودك جاد عبدك علينا ‏
حميت بيض الخرش بأم المحاحيل = بيض النحور وميتمات الجنينا ‏
من الشاوري والبن حنا مقاليل = مع الهوا يا شيخ ريحه غشينا ‏
من عقب مز العظم ورقط الفناجيل = عطيتنا مطلوبنا وأنثنينا ‏
أقفيت عن هرج القلوب المغاليل = أما بلونا بشر ولا ابتلينا ‏
وذكرت أنا ربعي فهود الرجاجيل = هم أنتحوا عني وحنا انتحينا ‏
ربعي هل العشوى إلى جدع الشيل = هذا نجي يمه وهذا يجينا ‏
قريبهم يحشم عن النقص والميل = والجار عده واحدٍ من حدينا ‏
وهرج بليا شهود ماله دواليل = والى نخانا الجار دونه ثنينا ‏
جانا النفيشي ناير يزعج الويل = باقه بيوق فوق بوقه يبينا ‏
واشهودها شمر قروم المشاكيل = هل اللحيسة منوة الجايعينا ‏
وصاح الصياح بنابي يا أهل الخيل = غز اللوا من فوق نابي البطينا ‏
ثم أعتلوا قحص المهار المشاويل = وبأيمانهم حدب النمش والعرينا ‏
وعدوانهم عادوا بياس وغرابيل =  وخيل تولت خيلهم مدبرينا ‏
نطحهم الصابور عوق المقابيل = من لابة بالكون حبس الكمينا ‏
ويوم انتحوا بمغذيات المخاليل = هنف الخشوم ودقهن يرتجينا ‏
طلبت أنا منشي المزون الهماليل = يا فاتح التوبات للتايبينا ‏
والله نصرني بالنمش شلتهم شيل = لعيون زرفات البكار انتخينا ‏
عندي شهود ولا بها قول ما قيل = أرسان الخيل اللي لأهلها رمينا


 

Share
جميع الحقوق محفوظة © الراوي – سالفة وقصيد.