قصيدة شاهي بن خالد اليمني

Share


قصيدة شاهي بن خالد اليمني
الراوي عبدالله بن دهيمش بن عبار


وهذه القصيدة للشاعر شاهي بن خالد اليمني من الجعافرة من ولد سليمان من عنزة :

نطيت بالرجم الطويل المعمر = معمر راس المبنا عداني
يا راكب اللي كنها الطير وأن فر = احصاب ربدا شافت الليل داني
أسرع من صلف الهوا جاني ومر = عليه حليا الريم بنت العماني
لا ابطا المغار من السطر ما تسندر = منوة غريب مد للشام عاني
ركابها دليلة ما ايتحير = قطاع دو عايز مطرشاني
تلفي على شيخ وراء النفد يذكر = قصره طويل وشيده بالمباني
يا ما ذبح من شمخ النيب عقر = دب الليالي ما يغضن الصياني
يا عل اللي شرواه ينمي ويكثر = يا ما عطا راعي العطا والحساني
من طبتك تيماء فلا طبها شر = يا مودع راس الصعب مرجعاني
حيثك من اللي بالطلب ما تعذر = ما تذخر الماجود والعمر فاني
وكبدي اللي يلهفه بالخفا حر = وشيب قلبي من ظروف الزماني
وعيني اللي دمعها بس ينثر = مثل الغروب اللي تشله سواني
خطو الولد حر مع الحيد يشهر = صليب شور وللعرب معشراني
وخطو الولد باول شبابه تقنطر = يصبر على موت البخت والهواني
تلقاه عن درب النشاما ايتوخر = بين الأناثي والذكر مغلطاني


Share
جميع الحقوق محفوظة © الراوي – سالفة وقصيد.