من شعر قطيفان بن سلامة في مدح الهذال


من شعر قطيفان بن سلامة في مدح الهذال
الراوي عبدالله بن دهيمش بن عبار


ومن شعر الشاعر الكبير قطيفان بن سلامة أبو ثميل الجميلي من أهل عرعر هذه القصيدة يمدح شيوخ مشائخ عنزة آل هذال عندما كانوا على باب مكيل القوافل و هم محط ركاب الرايح و الجاي وقد زارهم قطيفان وشاهد كرمهم فقال يمدح الشيخ محروت بن فهد آل هذال رحمه الله فيقول :

حيّك وعمارك عسى السيل يسقيك = ديم على ديم تساقيه الأمطار
اللي اليا جاء حزت الكيل نأتيك = كالن وحطن وادي نخيب مصدار
حيث أن فيك الشيخ حكمه محليك = العدمل اللي منزله بأيسر الطار
عنده عزيزه مثل عينه يداريك = والناس نوما بس يرعون الأشجار
من ماكر دب الزمن ما يخليك = عساه شيخك لين يمحن الأحجار
اللي بسط قاعك وركز عواليك = عسى لهم طالع وبالمدن حضّار
يا ما شبع برباعهم من حواليك = ويا ما تلذذ بالمروة على الجار
ويا ما عطوا في ماجبه واحدٍ فيك = واللي طلع منهم يتاقي عن النار
ماكر حرار وبالمخالب صواليك = أدنا بالأدنى كل من هد ما بار

ومن شعر قطيفان بن سلامة الجميلي أبو ثميل هذه القصيدة من غرر شعره يمدح الشيخ محروت بن فهد آل هذال شيخ مشايخ عنزة و يدعي لحمولة الهذال بالبقاء فيقول :

بديت بالله ذكر ربي بادي = خلاقنا رزاقنا والي القدر
يا من عزل شخب الحليب وحلله = من مثمل فرثٍ ومن دم حمر
طالبك يا رحمن يا قابل الدعى = مضوي النهار بشمس والليل بقمر
طالبك عز الشيخ وأرفع قدره = ولد فهد وسعد من هو به صقر
مضيفته مبنية للعاني = وصينيته مجرورة للي يمر
وريف القصير أن كان طول وقته = حيص إلى ثقل على حمله صبر
والطيب ما يضهر بليا خساره = وبل الثميلة ما يلاديه النهر
والحكي ما ينفع بغير اللازم = ولا تنفع الحيلة إلى قل الضفر
ذكره وصل نجدٍ واقصى الوادي = ويدرون فيه اللي ورا سود الحجر
قال الأديب أبن الأديب الشاعر = بالشيخ ولد الشيخ قيل مختصر
عنيت له واللي عناله رابح = لو هو كسير الساق لا جاله جبر
تقلط على الجودا وتثني وتنثني = حيثك شبيه سهيل لامنه ظهر
غديت بالناموس والطيب والصخى = مثل الشعيب اللي من الزهر خضر
أخص حاضركم وكل غيابكم = واللي أنجبه هذال من تاسع ضهر
بالعز والناموس والمجد والسعد = وانتم هل الطولات والفعل والفخر
شيوخ الشيوخ من الشيوخ القدايم = وأنتم شيوخ اللي بنا بيت الشعر
عاداتكم لا جاء الغريب بداركم = يسلم من الزودة ومن ظيم الدهر
وديوانكم يغدي العماس بمجلسه = واللي قدم فيكم عن الدنسه طهر
افرح بزودتكم وعزي عزكم = وأدعي لكم بالخير كل ابيض شهر
الساس من وايل من أصل طيّب = كما العد لا خاضوا بكوكبه انجهر
يروي على طول الزمان وينسني = من المال مدهال لزينات الوبر
صدره عقب ورده ونزله حوضبت = كما حرةٍ سوداء مدورها اندجر
تنازا السواني في دليه عبّر = كما النوح مطلوق عليه من النهر
تضحك لك الدنيا ويستر خاطرك = وقاعٍ تقرب لك يسقيها المطر


 

.
جميع الحقوق محفوظة © 2016 الراوي – سالفة وقصيد.