من شعر ناحي بن معتق الجعفري


من شعر ناحي بن معتق الجعفري
الراوي عبدالله بن دهيمش بن عبار


اما الشاعر ناحي بن معتق الجعفري العنزي فهو شاعر مجيد يمتاز شعره بعدم التكلفة وهو من هواة الصيد وله مدايح في بعض الأكارم من كبار قبيلة حرب وقد التقيت به وسجلت منه شريط بصوته ومن قصائدة هذه القصيدة بالنصح والارشاد يقول :

سميت بسم الله وذكره بادي = وانا دخيله عن كلام الزور
عز الله اني غادي يوم الجهل = والى عذلوني ما قبلت الشور
اقفا الصبا والشب لاح بعوارضي = وهذا هو السنة ما هو منكور
متناكر شي بتالي وقتي = غديت مثل المظمي المقهور
هموم تدالاني على الله حلهن = مدالا شياهين على عصفور
واصبر وعند الله مفاتيح الفرج = مضهر عباده من ظلام لنور
خطو الولد لو هو كثير ماله = يروح ماله كالهباء المنثور
مايعطي المحتاج لا جاء عاني = ولا يبدي اللي يرتجون الشور
ولاني بهلباج ضعيف شانه = يعد فعول الطيب وهو مثبور
قولت هلا للضيف عندي عاده = وعلى قصري والخوي صبور
والضيف له حق وذاك الواجب = اطلاقة الخاطر مع الميسور
وقصايري ماجيت اهمز روسهن = كان الرجال غايب ولا حضور
النفس عن باقي الأمور معزها = واللي تلا نفسه هذاك الثور
وان كان حظك ما يباري طيبك = ما يقال لك طيب ولا مشكور
ودنياك لو بأول زمانك زانت = خطر على اتلاها يصير مرور
دنيا تقلب ما تعلم بغيبها = احيان لك تقبل ونوب دبور
والى التحقت الابه محتاجهم = تصير في عين الفتى محقور
يا الله طلبتك لا تخيب ظني = ولا تخلي الدنيا علينا احسور
وبالاخرة تمحا الخطايا عني = وتكتب اعمالي عند وجهي نور
ولا تاكل الا ما قسم لك ربك = والحمد لله ما علينا قصور
واختامها مني صلاة علي النبي = على الرسول محمد المذكور

وهذه القصيدة من شعر ناحي بن معتق في الحكم والنصايح ويثني علي الشيخ حجر بن ناحل الحربي فيقول :

لولا العرب كلن بعقله راضي = وكلن دليله هو خيار الدلايل
اهدي على قروم النشاما نصيحه = ما تنهدي الاهل القلوب الهبايل
كم من صبي ضاع وابليس ضعيه = يعد ميل الناس وشيله مايل
تقوده النفس الرديه على الردي = حيثه عن المنقود ما هو مسايل
والنفس ودك عن هواها تهينها = وترى عزيز النفس خطة طايل
ولا تخلافس الجارات بمذنب عينك = وادمح خمال الجار لو هو عايل
يا عل جار ما يشيم جاره = ينسف على قبره طوال النثايل
والضيف زين له جوابك واكرمه = والله كتب رزق الدنيا بلايل
وترى الخويه عند الأجواد حقها = مثل امك اللي راضع له مشايل
والبطن ما هو كل يوم تمحنه = يا ما على راعيه عقب فشايل
لا اقبلت حيوبك وان اقفيت سولفوا = مليك لبطنك ما ذكر به نفايل
ولا ينفع المثبور حبه لماله = ولا يستوي مدح بليا فعايل
والى بدالك لازم جنب الردي = قضايت اللازم عيال الحمايل
عليك باللي مثل حجر انب ناحل = عز الله انه ذاك وافي الخصايل
ذباح كبش الضان لا قل الدسم = وصينيته تلقابها السمن سايل
واليا طلبته حاجة قال عندنا = ضاري لكسبات الثنا والجمايل
تشهد له افعاله وكلن خابره = والناس تدري بالعلوم الصمايل
وبرقت بالدنيا كفا الله شرها = مثل البراد اللي قفاه القوايل
دنياك مثل الضل يا جاهل بها = وقت الضحى مع حزت الضهرزايل
يا الله تسمح لي وتعفو عني = لا ضاقت الحيلات والمحايل
يا غافر لام العباير ذنوبها = حيث نت راعي الجود والفضايل
واختمها مني صلاة علي النبي = اعداد ما تمطر مزون المخايل

ومن شعر ناحي بالقنص وطرد الصيد والولع بالطيور هذه القصيدة يقول :

وقد العصير ارقبت راس الطويله = جيته وجيت وجبت منها علف طير
النوم والمقعاد مابه نفيله = والرزق عند الله ولي المقادير
ولا قيل رزق جايبينه بحيله = مار انت يالوالي عليك التدابير
يا اللي تعود للديار المحيله = انت الذي رزاق عوج المناقير
يا مسنع قلب غدابه دليله = ضرب طريقه ما يطيع المشاوير
قلبي عذلته مار ما فيه حيله = وقت الهدد يشفق على خزت الطير
ونفرح الى شفنا سحاب المخيله = مثل الهضاب مركزات مزابير
معي اشقر ضاري لصيد الجليله = يفتل عليهن والحباري مخامير
ان طالع الخرب المطرف يجيله = وعكف مخاليبه سوات الشناكير
والوكر بين اليد وبين النثيله = لازم نحله عن طريق المسايير

ومن شعر ناحي بن معتق هذه القصيدة يمدح الشيخ ابن ناحل من مشايخ قبيلة حرب بعد ان اسدى له معروف فيقول :

يا عل قاع المستجده تسيلي = يخضر بها عقب شهابه محلها
ينبت بها النوار هو الشتيلي = حتى يغدي مثل الزوالي وحلها
من شان ابو بندر مشيل الثقيلي = شوق الهنوف اللي توزي اقذلها
نوخ بسوق الطيب واكتال كيلي = والمرجله باول زمانه وصلها
تعيش يا عقب الحصان الاصيلي = موقف اجدوده وارثه ما انتحلها
لا صعبت القالات ما هو ذليلي = كم اعوجه بطراف شونه عدلها
والى ادلهم احجاج خطو البخيلي = كم حايل قدام بيته سدلها
ولا اشتد حر القيض بيته مقيلي = وترى المباني زينها فعل اهلها
وعز الله ان مشاهده يستويلي = ويا ليتنا ننزل بلاد نزلها
ولا قلتها ابغي عليها حصيلي = لا والذي ارزاق خلقه كفلها

وقال ناحي هذه الابيات يتمنى نزول المطر على ديار ابن ناحل الحربي ويثني عيه بعد ان اهدا عليه سيارة فيقول :

عسى الحيا يسقي مفالي غزاله = من مدلهم زابر مستخيلي
سيله يفيض من عوالي جباله = من شان ابو بندور عساها تسيلي
اللي شرالي من حلاله زماله = يوم ان مال اللاش ماله حصيلي
ذباح كبش الضان للي عناله = يغضي عن الواجب ردي بخيلي
وضاري لكسبات الثنا والجماله = وعادات ابو بندر يشيل الثقيلي
حلفت ما ادور رفيق بداله = ولا ادور بشيال المحامل بديلي

وقال ناحي بن معتق هذه القصيدة يثني علي بعض مشايخ قبيلة حرب :

يا طيب ربع لقيناهم بنمريه = يا ليت ما دونهم قاع سراميدي
يا عل تمطر عليهم كل بدريه = يخضر وطنهم وتسقيه الرواعيدي
حباب وخالد نشاما وانتبوا ليه = نشكر ثناهم ويزهون التحاميدي
وعوض يحاضي دلاله كل فجريه = والنوم خلاه لعيون النواويدي
والنعم بعبدالله تعدا ورى الميه = ما يفهق اللي عناله للمواعيدي
كم راس كبش يحطه فوق صينيه = زود عن الذبح ما يعرف التصاديدي
انا اشهد ان كرمتك ما هي دوينيه = تعيش يمناك يا قرم الاواليدي
سبع خرفان ذبحهن ضحيويه = هذا على ذاك ما فيهين تفاريدي
وكلن ركز له عمود وحاضر غيه = مثل ضحايا الحجيج بثاني العيدي
من كان حاضر بفعله شاهد ليه = والشاهد الله وهو خير الشواهيدي
وحتى ام خط الجديدة جابها ليه = يا من خبر مثل هذا يالاجاويدي
عساه عن كل شر براس عليه = عن شر خلقه وعن شر الحواسيدي
الطيب ضلع يعذب من بغا رقيه = والحر الاشقر هو اللي يذبح الصيدي


.
جميع الحقوق محفوظة © 2016 الراوي – سالفة وقصيد.