قصيدة من شعر سعد بن مقبل الحريري
الراوي عبدالله بن دهيمش بن عبار
هذه القصيدة قالها سعد بن مقبل بن عيسى الحريري يوصف ماضي حياة البادية فيقول :
يقول من جزل القوافي بدع فيه = عذب المثايل من ضميره نظمها
القاف من جزل المعاني مسويه = أمثال فكري بالصحايف رسمها
من بعد ما هاضت خواطر تشفيه = عواطفي تخرج على من حكمها
يا الله ياللي كل مخلوق يرجيه = يامن دقيقات الخفايا علمها
يا رب تبعدنا عن الغي والتيه = بدنيا تداخل نورها مع اظلمها
وتدلنا بدرب الرشاد ومباديه = وتجعل لنا خير الأمور ودعمها
دنيا تقلب دوم من غير توجيه = صارت خيار الناس تتبع خدمها
والمجد كلن بالعرب يدعي فيه = تناست الماضي ونسيت سهمها
مواقف حتى التواريخ تطريه = والغرب سجل من نوادر اعظمها
وأن مد شيخ القوم فالقوم تتليه = وعلى المعادي لبسوها عسمها
وعادوا بكسب معظمات المشاريه = والكل أخذ قسمه بوسمه وسمها
وأن صاح صايح قالوا الكل لبيه = أن روحوا بالنوق ولا غنمها
وركبوا على قب وساروا مساريه = والخيل طيّر بالصحاري كتمها
وأن كانهم لحقوا وبانت محاريه = تباشروا والكل ربعه لزمها
وثار العجاج وشاف كلن معاديه = وكلن طمع يبي الخصوم يهزمها
حل الطراد وصار بالقوم تشويه = ثم أنجلا الدم الحمر عن لحمها
وطاحوا رجال بالمواقف مواجيه = وبان الجريح وعودوا في حطمها
وكم فارس بالكون قطعت علابيه = وكم سابق قامت تخطف نسمها
عادات ربعي كل خصم تلاقيه = لا شك ما خلت عوايد اشيمها
مدهال للضيفان والجار تحميه = وعاداتهم مبطي عريق قدمها
يزبنهم المظيوم والضيف تقريه = واموالهم بالكون ما احدٍ قسمها
أهل الجمايل والحمايل تراعيه = وعن الردى والعيب ربي عصمها
وأن جالهم محتاج بالمد تعطيه = واللي يقصر من ضميره خصمها
وراعي اللوازم بالمواقف اتبديه = كلن يبادر والثمينه كصمها
وحيدهم ملزوم للي ايخاويه = لا رافق السفرات صار ايخدمها
ونفسه اليا بانت مواقف تعديه = البنعمه دون الشرف ما رحمها
يمشي على نيه سليمه وتوجيه = وأن جت زينه بالمجالس دعمها
حق الوفاء والعرف والطيب يعطيه = ويدرى الخواطر باللغا ما زرمها
أهل البيوت البينات المنابيه = بيبانها للضيف ما أحدٍ وصمها
ونجراً بها بالصوت يسمع مناديه = وادلال صفرٍ بالوزيزة دحمها
الكيف فيها للمسير أيقهويه = بن ومعاه الهيل يطرد ضرمها
البدوا عز ومكرميه وتنزيه = والحمد لله خالقي ما حرمها
مسكانهم ربي من الوسم يسقيه = من مزنة غرا عليهم خرمها
وسحب تساقى بين علوه اواديه = تسقي مراها ثم تسقي وخمها
وتخضر منازلهم وتنبت مفاليه = قطيطها مع هضبها مع اتهمها
وتزرع به الأعشاب والقطرمرويه = نوارها يشدا بياضت رخمها
ترعى بها القطعان والرمي حاميه = لين المواشي ما تحمّل شحمها
وتقاصرت فيه الربوع المواجيه = في فترت المرباع ما احلا زعمها
هذا يمد وصاحبٍ له ايباريه = وهذاك ذوده بالمراتع نهمها
وميرادهم عدٍ طويله مداليه = وكلن بفرزه لين يقبل عتمها
قرط الدلي مع جمة الطي توحيه = والكل ذوده يم حوضه زهمها
الباديه قلب المولع اتسليه = يا زين ممشاها وما احلا نغمها
ولا زال مجد الباديه نفتخر فيه = موارث ما احد استطاع ايهدمها
لا شك من يفخر بجده وماضيه = من واجبه بالطيب يرفع علمها
يا عاد مالك بيناً تستتر فيه = ما ينفعك جود الجدود وكرمها
وصلاة ربي في كلام امبديه = نقولها وعلى الرسول انختمها
