قصائد من شعر الشاعر حميّد بن خلف الملفي


قصائد من شعر الشاعر حميّد بن خلف الملفي


قصائد لشعراء معاصرين مسنده على عبدالله بن دهيمش بن عبار


ومن شعر الشاعر حميد بن خلف الملفي هذه القصيدة يسند على عبد الله بن دهيمش بن عبار يقول :

بديت بسم الله عالم خفا السد = الواحد المعبود رب البريه
اللي له عباده تصلي و تسجد = و هو الذي يعلم أمور خفيه
و من بعد ذكر المعتلي طايل المد = سويت جزلات البيوت العذيه
تهدى لجناب الوايلي زاكي الجد = عبدالله اللي مشتهر بالحميه
قرم على الطلات له دوم مقعد = و أهداف راعي الطيب دايم نقيه
قرم افعاله دايم مالها حد = راعي اليمين الطايله و النديه
من لابة بالكون للموت تورد = عزوة هل العشوى هل الغايريه
يتلون أبن حريميس بالطيب ينعد = و النعم بأبن ضبيب ملحق خويه
و القرم أبن درعان بالطيب يجهد = و القلفا و أبن جبيل لا صار هيه
و نعم بأبن ضبعان بالكون ما صد = و أبن شريعه بالسنين الرديه
و القرم أبن عجلان للمعتدي ند = و أبن جهيم ما يهاب المنيه
و من غيرهم فرسان بالحرب تزهد = صيارم ما يتبعون المديه
هذا و أنا من لابة للعدو ضد = اهل الشجاعة و الكرم و العطيه
ربعي عيال كحيل خلفت محمد = يتلون أبو فواز زبن الونيه
ذعار أبن نايف افعوله تمجد = و جلغان أبن عرنان للضد سيه
و حزام بن منديل و غازي و ماجد = و مسفر أبو حمراء عزومه قويه
وابن زعير أن كان وطيسها اشتد = و سلطان أبن عبلان ينطح سريه
هذي فعايل لابة كلها بجد = فدعان ولد وعزوة ماجديه
“تاريخهم مذكور بالكتب ينعد = ولنا الفخر بالعزوة الوايليه
ولا أنت ما قصرت بالحيل مجهد = وسجلت تاريخ الرجال الأبيه
وسويت كتب للقبيله بلا عد = ما ينسي موقفك دون السميه
من أجلهم تبذل من المال والجهد = تعيش يا راعي الفعول النقيه
جاكم جوابي منرسله و أطلب الرد = نبي مردك قبل وقت العشيه
أرسلت لك يا مسندي بيوت أجدد = و الأوله ما جاء مرده عليه
و ختامها صليت على محمد = اعداد ما ركبوا بنات العبيه

وقال الشاعر حميد بن خلف الملفي هذه القصيدة يثني على عبد الله بن دهيمش بن عبار يقول :

بديت بسم المعتلي عالي الشأن = الواحد المعبود منشي المخايل
و من بعد ذكر الله نظمت قيفان = مثايل تهدى لذرب الفعايل
تهدى لأبو مشعل سلايل كحيلان = عبد الله اللي بالفخر له دلايل
قرم بفعل الطيب له مواقف بان = ما تنسي مواقفه دون وايل
بشهد على ما أقول كتب وشرطان = للوايلي تشهد جميع القبايل
الشاعر المشهور من نسل فدعان = علمه شهير و للعلا دوم طايل
مفكر و شاعر و أديب و فهمان = و حكيم راي ولا يحب الهزايل
يا أبو مشعل يفداكم النذل كوبان = يفداك من يمشي بدرب الرزايل
قلته و أنا من لابة شانهم شان = أهل الكحيلة يحتمون الدبايل
يتلون ربع بالملازيم شجعان = ربع لهم بالطيب قول وفعايل
خالد الهزبر وأبو فارس و مشعان = و ملاهد بن زعير من نسل هايل
و أبو سعود القرم ما فيه جحدان = عبد العزيز اللي يحوض الجمايل
و اختامها صلوا على نسل عدنان = على الرسول اللي و مر بالفضايل

وقال الشاعر حميد بن خلف الملفي أيضاً هذه القصيدة يسند على عبد الله بن دهيمش بن عبار :

بديت بسم الله منشي الرواعيد = محيي الخلايق و العظام الهميده
و من بعد ذكر الله نبدي بتمجيد = في مدح قرم بالموقاف وليده
عبد الله العبار ربعه صناديد = أهل العلوم الطيبه و البعيدة
يا كاتب التاريخ يا أبن الأواليد = سويت كتب للقبيلة عديده
اللي فعايلهم مثل فعل أبو زيد = أهل الشجاعة و العلوم المجيده
كتبت عن عناز بشر و ضنا عبيد = و يفداك من وهو ينتقد بالجريدة
و يفداك هلباج علومه سراميد = ما ياصل اعمالك ولا الطيب بيده
سر للإمام ولا تطيع الرعاديد = أشوارهم ما أظن منها مزيده
قلته و أنا من ساس جمع العواويد = اللي سوالفهم افعوله حميده
يشهد لهم مذهان و ذعار و عبيد = و الكل يشهد للشجاع أخو عيده
جاب المناسر من ديار الأكاريد = أبن ضويهر كل ربعه شهيده
وفياض باللقوات مابه تجاحيد = قرم العيال اللي عدوه يصيده
وصلوا على محمد لكل العرب يسد = مرسال رب البيت يرشد عبيده

وقال حميد بن خلف الملفي أيضاً هذه القصيدة يسند على عبد الله بن دهيمش بن عبار :

بديت بسم الله منشي الرواعيد = رب الملأ رزاق كل العبيدي
و من بعد ذكر الله نبدي أناشيد = مثايل يا عبيد لها نجيدي
هات القلم و البوك و الحبر يا عبيد = القلب متشوق لنظم القصيدي
و المدح يزهى للرجال الصناديد = أهل الجمايل كاسبين الحميدي
شروى أبو مشعل من قروم الأواليد = الوايلي معروف رايه سديدي
الله يكثر خيركم يالأجاويد = و الشر جعله دوم عنكم بعيدي
كم مرة في بيتكم كنها عيد = يا عل رزقك يا أبو مشعل يزيدي
عساك تبقا يالسنافي تقل حيد = عن السموم اللي لهوبه شديدي
يا القرم يا نسل الرجال الأماجيد = أشكرك يا راعي الوفاء يالعنيدي
يفداك هيس و من عفون مقاريد = هيس و خبيث أعمال و أيضاُ بليدي
ولا أنت ما قصرت من دون تحديد = كتبت للويلان كتب تفيدي
يوم العفون أهل السوالف ملابيد = عملت للويلان مجد وحيدي
و أرجو السموحة عن كلام المناقيد = نحيد عن هرجة سفيه مريدي
قلته و أنا من ساس قوم معانيد = اللابة اللي للمعادي تكيدي
أفعال أهلنا دون كذب و تزويد = قولي صحيح ولا بقولي أزيدي
من دور أخو مزنة زبون المحاريد = نزال أبن ملفي شجاع عنيدي
و أبوي أخو عيدة يشهد له عبيد = يوم توفى وقال و الله فقيدي
و حزنوا على فرقاه كل العواويد = و اللي يعرفه من قريب و بعيدي
قرم إلى صرد على الخصم تصريد = نعم بأخو عيدة لضده يكيدي
وقبله فعل فياض قرم و صنديد = فياض أبو سلطان علمه بعيدي

وقال أيضاً حميد بن خلف الملفي هذه القصيدة يسند على عبد الله بن دهيمش بن عبار :

بديت بسم اللي يجل الكليفه = رب الملأ منزل مزونه مراهيش
و من بعدها جبت القلم و الصحيفه = أكتب جزيل القاف مابه تغاشيش
نسند على رجل علومه شريفه = هو أبو مشعل من رجال الحناتيش
قرم العيال و عز جاره وضيفه = من ساس لابه بالملاقا مداغيش
رجالهم يروي شبا حد سيفه = يسقي حدود مصقلات المعاطيش
عاداتهم يروون حد الرهيفه = ضد العدا لاركبواوالخيل والجيش
واعلومهم بين القبايل طريفه = مع الضيوف علومهم والمطاريش
ويوم الملاقا والحروب العنيفه = عز الدخيل وضل لاجي ودرويش
يا مسندي يفداك خطو الهديفه = الله يفكك من جميع المغاشيش
سجلت تاريخ الرجال الكليفه = زبن الدخيل وبالمسيّر مباشيش
أولاد وايل للمجنى سقيفه = في ضلهم نامت جميع الدراويش
منهم أبن مقرن وصفوة خليفه = ومنهم زبون الجاذية جابرالعيش
سجلت فعل اللي عليهم حسيفه = يمناك تسلم يافتى الجود واتعيش
وصلوا على اللي جاب دعوة عفيفه = محمد المختار من صفوة قريش


.
جميع الحقوق محفوظة © 2016 الراوي – سالفة وقصيد.