قصائد من شعر سالم العماوي الحازمي


قصائد من شعر سالم العماوي الحازمي
الراوي عبدالله بن دهيمش بن عبار


أما الشاعر والراوي المعروف سالم العماوي الحازمي رحمه الله فقد قابلته و هو قد أشرف على المائة عام و كان يحفظ الكثير من القصص و القصائد وقد نقلت عنه بعض القصائد و القصص و كان يلازم مجالس الرجال منذ صغره و أطلق عليه لقب (الشويب) و هو طفل لملازمته مجالس الرجال و اهتمامه و حفظه للأشعار و من شعره هذه القصيدة قالها في مطلع صباه يقول :

يا راكب اللي للعصا ما يداني = يشدا ظليم بالحماده لمح شوف ‏
كرب قعودي بالحقب والبطاني = امفتل العضدين والبطن ملهوف ‏
وامشولح يقطع بعيد المكاني = يشدا عنود قادت الفرق واخشوف ‏
وأن لاحوا الغلمان فوق السماني = متربع بكوارهن كل منقوف ‏
أركب على اللي حافظه من زماني = لا شحشح المقصاد تلقاه مردوف
يلفي على اللي بالمحبة رماني = زين الحلايا والتماثيل واوصوف ‏
الجادل الغطروف صافي الثماني = مثل البرد لاهل من مزن شفشوف ‏
ولا ريد أنا المجمول لو ما بغاني = لو كان زوله ناعم العود غطروف ‏
يا هيه ياللي ما بساسك اهداني = الله يفكك من عواثير واصدوف ‏
والمرجله بيت عذي المباني = وصينيته يشبع بها كل هذلوف ‏
والمرجله محوال خلف المواني = يوم النشاما مدبحين من الخوف ‏
والثالثة الهرج عند المعاني = احفظ لسانك لا تطّوف مع الطّوف ‏

وقال سالم العماوي في صباه هذه الصيدة :

قولوا لها يا وفود ياللي تجونها = ما طب قلبي من هواها هجارس ‏
شفي مع الشجعان بكوار ضمّر = وعلم يجينا تالي الليل نايس ‏
كم وادي خبت الثمام اقطعنه = واٌفن بنا مثل المحال الممارس ‏
يا ما تضرسن بنا بديرة العدا = كنه مضاريس الوحوش الفوارس ‏
منهن حمرا والخدايم برجلها = تجض تجضيض الكسير المدارس ‏
لا صر جادوب الخلا صانتت له = مصانتت عذرا من البيض عانس ‏
ومنهن ملحا شايب راس متنها = تجي على حس المغني تضارس ‏
ومنهن عفراء كل ما قلت قصرت = تجر أثاريها جديد ودارس ‏

ومن شعر سالم العماوي هذه القصيدة يثني على أبو سعدي الصقري و حمود بن جزان و جبارة الحشاش وأبن وقاع العقيدي فيقول :

مبداي بالمعبود رب البريه = يا خالق الدنيا ويا باسط القاع ‏
ويا عالم بالبينه والخفيه = غيرك أنا يا رب ما اريد فزاع ‏
عالوا عليه عيلةٍ جرهديه = يا رب ياللي للمخاليق شفاع ‏
وخلاف ذا يا راكبين المطيه = جدعية تضرم على المشي مطواع ‏
إلى سرت في ليلة خرمسيه = ركابها قرم على الدرب بزاع ‏
ملفاه أبو سعدي زبون الونيه = يفرح به المظيوم لا جاه فزاع ‏
حطاط للخطار تمر الوديه = وصينية يشبع به كل من جاع ‏
تستاهل البيضاء براس البنيه = يا حامي الوندات في تالي الأقطاع ‏
وحمود أبن كزان ذيب السرية = تلجاله الشردان كان البصر ضاع ‏
واجبارة الحشاش وش أنت ليه = زبن الطريح إلى اتقى كل مخضاع ‏
أنا ظلمت وقام يدهر عليه = وعن الظليمة داخل بأبن وقاع ‏
نبغي حقوق جدودنا العدمليه = أنا أشهد أن الصدق للكذب قمّاع ‏
وشهود ربعي بالختوم النقيه = ماني هريد ولا بعد قيل طماع ‏

ومن قصائد سالم العماوي هذه القصيدة يحاور بها ذلوله فيقول :‏

يا راكب الحمرا ردوم المرابيع = سنامها يشدا زبار العدايم ‏
أنحا بهواها نية القلب واتطيع = ركابها ما هو خطات الهلايم ‏
أنا بغيت أبيعها بالمطاميع = وفطنت عليه ليلة به لوايم ‏
قالت أنا يالقرم ما استاهل البيع = وأنت اتخبرني يوم قطع الخرايم ‏
وأنت اتخبر يوم النشاما مفاريع = ومحزمين لون نقل الهشايم ‏
يوم الردية مبركه مسهل الريع = وأنا أورد العطشان ورد الحمايم ‏
يا مل قلب عذبته المراميع = لوهني الطير ولا البهايم ‏
النوم ساس اللوم يا أهل المنافيع = ما عاش بالأيام من ضل نايم ‏
ودك مع الغلمان شبعان وامجيع = ولمحلا المقصاد عقب السمايم ‏

وقال سالم العماوي هذه القصيدة عندما مرت عليهم سنوات قحط شديدة أهلكت المواشي وكان قد تغرب عن جماعته ثم عاد لهم وهو فقير الحال :‏

يا الله ياللي كل أمرٍ تسويه = أنت الكريم ولا تقفي قصاوي ‏
يا رب يا جياب مزنٍ امشيه = يا والي الدنيا على الناس قاوي ‏
لا عاد ما عندك حلال تراعيه = فقير ما عندك نياق ومهاوي ‏
أسرح ابلك ذود بعيد تواليه = ترى النصيحة تنشرى يالعماوي ‏
حسرت قليل المال واقل واليه = لو هو بوسط الناس عده خلاوي ‏
ماله صديق بالمحبة أيصافيه = وعزي لحاله ما لجرحه مداوي ‏
تلقا كثير المال متمدري فيه = لو هو من الغلمان عطب الأهاوي ‏
الشور عند اللي غلاض علابيه = كانه من البدوان أو صار شاوي
وجدي على ذود مع الدوا نتليه = وعزي لحال اللي حلاله مناوي ‏
وجدي على اللي يقطعون الرهاريه = قلبي على كل المراجل شفاوي ‏
وجدي على مهرة من الخيل غاذيه = تجفل من أصوات الغنا والحداوي ‏
ووجدي على بيت عذيه مبانيه = تلقابه الخطار وأيضا الفداوي ‏
الطيب اللي طاب حظه ايقديه = والطيب ما هو بالحكا والهزاوي ‏
الطيب تلقا النور في وجه راعيه = باتقلط المنسف ودق القهاوي ‏
والطيّب اللي دوم سيفه أيباريه = وعند القرايب ما ذكر له شكاوي ‏

وقال سالم العماوي يمدح رجال من قبيلة الفرجة وبعض رجال أهل الجبل الفاطر :

اللي عندنا علمها بان = أبشر بها يالديس ما هي بعيده ‏
عند الغياث اللي مشاريق حوران = صدق بشوف العين ما هي وعيده ‏
يا راكب من عندنا فوق عبدان = يسري ومصباحه بيوت السعيده ‏
يلفي على بيوت بها العصر ديوان = الله بنو الخير ربي يزيده ‏
سلم على صوعان وعيال سكران = وطويرش اللي عند ربعك حميده ‏
لهد راع البلها على الطيب شفقان = زبن الطريح اللى تونى فديده ‏
وعده لمحمد شوق مياح الأردان = وهليل اللي كل جزله يصيده ‏
خلف وبن ملحا على الضد شجعان = يوم اللقا يروون حد الحديده ‏
عيال الفريجي كنهم وصف عقبان = أبن عقل يا حي هاك الوليده ‏
أعنز على الطيّب اليا صرت بحلان = ولد الضعيّف من مناهج سعيده ‏
أبو قاسم يا بعد الهيس كوبان = يفداك عفن ما يفوت النضيده ‏
يا القرم أنا رافقت حضرٍ وبدوان = بالطيب والناموس حالك فريده ‏
لا فات باللقوات سابق وذلوان = هل الرباع اللي علومه بعيده ‏


.
جميع الحقوق محفوظة © 2016 الراوي – سالفة وقصيد.