قصايد للشاعر خلف المحدى الغبيني


قصايد للشاعر خلف المحدى الغبيني


قصائد لشعراء معاصرين مسنده على عبدالله بن دهيمش بن عبار


ومن شعر الشاعر خلف بن محدى الغبيني هذه القصيدة يسند على عبد الله بن دهيمش بن عبار فيقول :

أشكي لأبو مشعل عريب الجدادي = عبدالله العبار عقب الحراري
حيثه كما ذيب مع الليل عادي = بين الملا يزيد فيه أفتخاري
أنشدك عن توصيف رجل حيادي = رجل زمانه طول الأيام عاري
رجل على كل المناعير سادي = و إلى قرب له ساري الليل ناري
آمنت بالله ما يمل القعادي = لاشك عند الضيف ماله و قاري
و أسألك عن حر مع الناس هادي غربي شعيب طريف صاد الحباري
و أظن ما يخفاك طير الهدادي = حر ولد حر على الصيد ضاري
حر بصوته للقرايب ينادي = جانا كلامه مع هبوب الذواري
عندك خبر قزا البعير القرادي = تشكي من الوعات سفن الصحاري

وهذه القصيدة قالها الشاعر خلف المحدى الغبيني رداً على أحد قصائد زميله عبد الله بن دهيمش بن عبار يقول :

قريت جزلات القوافي على الآخ = من نظم أبن عبار قاله على الأيخ
الوايلي قافه تقل نسخ نساخ = فارس قوافي يفتهم بالتواريخ
بالقاف ما هو هلقماني و فخفاخ = و ايطرخ المعنا على الكيف تطريخ
ما هو مثل منظوم خطات الأبياخ = اللي كلامه بيخ الشعر تبييخ
يا عل يفدونه هلابيج الأزناخ = الحاقدين الحاسدين المماتيخ
مني لأبو مشعل تحيه بالأنساخ = الشاعر اللي ما يهاب النوافيخ
شاعر بني وايل من شبيح لشواخ = و من ديرة الحرة إلى وادي كليخ
سيف الحمية لا حصل طاخ طرباخ = يشكر بمدح أهل العلا و التشاميخ
مدحت أخو بقشة للأثقال زداخ = موقفه بالعز ما هي برابيخ
جولة بني وايل من اتلول الأكلاخ = من عين ذكر ثم من دية الشيخ
اللي تعنا من مشاريق شواخ = و اللي لفا من الهيل و أما الصلابيخ
ووقف لهم ما هي خرافات و أزلاخ = يوم زبنوه عيال و ايل مداويخ
الشيخ أخو بقشه للأخصام بزاخ = بالسيف الأملح بزخ اعداه تبزيم
الوايلي يوم المصاويل لباخ = بالسيف وطخ عالي الراس توطيخ
و أخو ذكر لوجيه الأضداد لماخ = الباسل اللي كمخ اعداه تكميخ
الشيخ الأمعط للخصيمين لخاخ = الصيرمي خصمه جداه التصاريخ
مواقفه تصعب على كل ملاخ = ما هو من أصحاب القلوب المدرايخ
نعم بالأمعط لو دفن وسط برزاخ = فضح قلو اللي تحدوه تفضيخ
نعم بالأيدا و العواجي لنا أشياخ = اهل البيوت العاليات المشاميخ
ما فيهم اللي بالأصابيع فتاخ = ولا فيهم اللي قدم العذر تفتيخ
هلوا بنا يوم المتاعب و الأدواخ = و اليوم صافي جوها ما بها امريخ
يوم الشفايا بالملازيم كلاخ = خاطوا مفاتيق الشقوق المشاريخ
يفداهم اللي صايبه كبر و أنفاخ = بعض البوالين البدان المتافيخ
عظم الهلامه مابها دسم و امخاخ = من شين فعله شلخ الشمل تشليخ
عده عن اللابة بديرة كراباخ = و أن جيت له تنخاه كنه من الشيخ
لو هو سلايل حر للريش لفاخ = طير الفلس لا فرخ يحسب ولا فريخ
يأخذ على أصحاب الفكاهات طرباخ = و على الرفاقه يرفع الراس و يميخ
عشيره اللي للهرابيد صماخ = وصديق للي من الكرامه مفاصيخ ‏
مجد الفخر يوم أحمر الدم ضخاخ = بزمان ماجد يوم يزبن على فنيخ ‏
قلته ولاني بالتماثيل مراخ = أعطيك يالمنعور مشخول أباللميخ ‏
وصلاة ربي عد ما بخ بخاخ = على رسول نوخ الكفر تنويخ
وصلوا عدد ذرات رمل بالأمراخ = وأعداد ما ينبت على وادي امنيخ ‏

وقال خلف بن محدى أيضاً هذه القصيدة يسند على زميله عبدالله بن دهيمش بن عبار و معزي بن طليان الخريصي :

راكب اللي يا مشى مشيه عدالي = يعجبك ممشاه بالخط العطوف
ما هوى بالبيد مع روس العوالي = كنه الشيهان لا شاف الرفوف
نوع جمس إلى همزته بشتغالي = من حدوا ممشاه بالسرعه يطوف
و المكينة دقها دق السحالي = صافيه ما ثر بها دق البلوف
من الوكاله للتريله للسهالي = للمعارض للمخابي للوقوف
من الجبيل اليوم يمشي بالعجالي = لازم ممشاه من قبل الكشوف
عاني من عندنا يحمل مقالي = للرفاقة عزنا ريف الضيوف
أبو مشعل بالفخر ذرب العيالي = بالوفاء والمجد والطيب معروف
لابته بالكون لا جوا بحتمالي = خصمهم بالكون يمشي ما يشوف
لابته بالكون ماضين الفعالي = لا تلاقوا بالرماح وبالسيوف
أهل العشوى مثل حيد بالجبالي = ماتهزهز راسي بوجه العصوف
و أبو فيصل منزله بالمجد عالي = شبه حر ما يصيد من الضعوف
لا هوى بالحوم يصيد الجزالي = أبو فيصل فايز فعله بنوف
لابته بالكون حماي التوالي = لا اعزوا بالروم و الموقف كلوف
لا أعتزوا بالروم في يوم القتالي = فوق سرد الخيل بالسيف العكوف
عوايدهم باللقا جدع المدالي = كم غلام طاح راسه و الكتوف
لابة بالكون يرعون المفالي = ما هابوها دايم لو صار خوف
هذا قولي في كريمين السبالي = ربعي الفدعان طلقين الكفوف
أمدح الفدعان وافين الخصالي = ريف من هو شاف من وقته حفوف
أمدح الفدعان في جور الليالي = الخوي والجار به دايم تروف
أمدح الفدعان لا صار انعزالي = يدحرون الخصم وعيونه تشوف
أمدح الفدعان يا جالي مجالي = ولا سألت عن الردي هو والهلوف
أمدح الفدعان في قيل طرالي = ومن زعل من قولنا جعله ذلوف
يا عبد الله قل لمعزب ما جرالي = أخبره يالقرم تفداك الضعوف
أخبره يالقرم تفداك النذالي = وقله خلف بالأسى شاف الصدوف
أخبره يالقرم كان أنه يسالي = أخبروه بكل تفسير الحروف
يا أبو مشعل يا أبو فيصل عزتالي = هايم عقب الطرب شفت الكسوف
هايم عقب الطرب عزي لحالي = عزتي لي من صعيبات الظروف
لي ثمان سنين وقتي ما صفالي = و هجس قلبي لافني بالقلب لوف
قلبي اللي ساعي ولا أحد درالي = مثل ذيب بالخلا صار مهروف
أو خلوج يوم صكات الحلالي = عقب فقد حوارها دلت تسوق
أو كما الهويان يرجي شوف غالي = ما جداه الا التوجد و الحسوف
على ربع من صناديد الرجالي = أشملوا يتلون براق الصيوف
أشملوا من عندنا يم الشمالي = الحراوي قربهم عين الزلوف
لهم حروة بين الزيدي و الدوالي = و أنشد المقطان يا جيت العروف
معهم اللي كنها ريم الغزالي = شبه ريم بالفلا قاد الخشوف
يالرفاقة هذا اللي زاود اهبالي = من هواها صار في قلبي شطوف
من هواها صار في قلبي هبالي = خل قلبي حبها خل الدفوف
يالرفاقه غيرها ما أريد غالي = و المسائل امكنوها لا تطوف
امكنوها لو سياقة بالريالي = لا أدفعه لو هو يقدر بالألوف
أختصر ما قلت لو القاف طالي = و أقبلوا ما قلت يا ريف الضيوف
أقبلوا ما قلت من رجال مثالي = و جاوبوني كان تقوون الحروف
و الصلاه اعداد وبل بالخيالي = أو عدد من كان بالكعبة يطوف


.
جميع الحقوق محفوظة © 2016 الراوي – سالفة وقصيد.