قصايد للشاعر طراد بن فرحان الرسلاني


قصايد للشاعر طراد بن فرحان الرسلاني


قصائد لشعراء معاصرين مسنده على عبدالله بن دهيمش بن عبار


وهذه الأبيات قالها الشاعر طراد بن فرحان العنزي يسند على عبد الله بن دهيمش بن عبار :

يا راكب اللي ضاري للمشاوير = هو منوت اللي ناحر دار حيه
فوقه اثنين و كل أبوهم شنافير = و الكل منهم فاهم بالقضيه
جمس جديد و كن شيه على انبير = مع الجموس اليوم ما شفت زيه
يلفي لأبن عبار ريف المسايير = عز الله انه من رجال الحميه
عطه الكتاب و علمه بالتفاسير أشكي عليكم يا عريب السميه
عجل لنا بالرد أسرع من الطير = و أسرع من اللي جاه برد عشويه
جتني اهمومي بالضماير طوابير = و الفكر زوع ما بقاله بقيه
رد الخبر يالقرم قل لي وش اتشير = عسى الولي ياقاك من كل سيه

وقال أيضاً طراد بن فرحان هذه الأبيات يسند على عبد الله بن دهيمش بن عبار :

يا راكب اللي بالسماء تقل شيهان = سواقها يعرف جميع المسارات
فوق السما ممشاها في كل الأحيان = من نوع ميق و صانعينه خواجات
توصل لأبن عبار في وين ما كان = ود السلام و بلغه بالتحيات
ثم أخبره عن حالتي يا أبن رسلان = وقله تراني بأنتظار الجوابات
أوجس يشب بداخل الجوف نيران أسهر طويل الليل و أكتب عبارات
قله ترى قلبي تولع بخلان = و القلب عيا لا يطيع العذالات
وجدي على قرب الرفاقه هل الشأن = قولي صحيح ولا ذكر فيه زلات

وقال أيضاً الشاعر طراد بن فرحان العنزي هذه ألبيات يسند على عبد الله بن دهيمش بن عبار :

بديت بنظم القيل و بالله سميت = الخالق المعبود عز الجلالي
يا راكاب اللي تو غير له الزيت = جمس مورد من جديد الشمالي
متوجه يم أبو مشعل بتوقيت = وصل سلامي و أخبره عن احوالي
و جرح قلبي للدكاتر تشكويت = من بعد فراق الزين حلو الدلالي
يا ما ويا ما من هوى الزين ونيت = و أجاذب الونات عزي لحالي
إلى ذكرت الزين يالقرم فزيت = أنا و خلي فرقتنا الليالي
و من بعد فرقا صاحبي ما تهنيت = و الله يعلم يالزميل ابحوالي
ورقيت رجم عالي ثم ناديت = أندب بعالي الصوت ما أحد درالي


.
جميع الحقوق محفوظة © 2016 الراوي – سالفة وقصيد.