قصيدة الخيبري مولى الشيخ نواف يتوجد على نواف


قصيدة الخيبري مولى الشيخ نواف يتوجد على نواف
الراوي عبدالله بن دهيمش بن عبار


هذه القصيدة للشاعر الخيبري أحد موالي الشيخ نواف بن النوري ابن شعلان يتوجد على الشيخ نواف حاكم الجوف سابقاً ويسند على الشيخ فواز بن نواف الشعلان والشيخ طراد بن سطام الشعلان فيقول :

البارحة وسط الحشا دك دكاك = بالصدر نار وبالنواظر شرارا
على الشيوخ اللي يقولون لي هاك = غابت نجوم مضللين القصارا
يا جوف عقب مبيّد الهجن عفناك = الا أن ضهر سلطان مثل المنارا
راجت ذلوله تقل شراب تنباك = ما لقت كود الخيبري والعذارا
راجت على ذولا وذولا وذولاك = وأقفت تحن ودمع عينه نثارا
لاجت على الماء راسها تقل شبّاك = مع ظن بالي غادي له حوارا
أنتي غدالك حاشي تقل مجكاك = أما يمين البوش ولا يسارا
وأنا غدالي مدبس الخيل فكاك = فك الطريح من الجموع الكبارا
يا عم يا نواف ما والله أنساك = يا كود ينسن الرجال العذارا
يهل دمعي كل ما حل طرياك = ثلاث وأربع فوق عيني تبارا
يا طراد يا عز الخوي لا عدمناك = الحر مثلك يفتهم بالأشارا
فواز لامن عسكر الريش يشفاك = يا عل ما ينثر عليه الغبارا
وأن كان ما أنت اتسيّل الدم يمناك = راحت ربوعي يا أبو سامي فرارا
لاني أبو عيله ولاني بملاك = ولاني مربوط ولا برجلي هجارا
حملي خفيف وخالقي حل الأشراك = والذل يبرك فوق راس الحبارا
وصلاة ربي عد ما دار الأفلاك = وأعداد ما دار القلم وأستدارا


.
جميع الحقوق محفوظة © 2016 الراوي – سالفة وقصيد.