قصيدة الشاعر حطاب الهينامة الفريعي


قصيدة الشاعر حطاب الهينامة الفريعي
الراوي عبدالله بن دهيمش بن عبار


وهذه القصيدة للشاعر حطاب الهينامة الفريعي يمدح الشيخ راكان بن مرشد ويثني على حمولة المرشد من مشائخ قبيلة السبعة فيقول :

حطاب ولف من بيوت عذيات = باخوان عشوى مقحمين الدبايل
نقوة حرار ولا يهابون اصابات = رجالهم ما هو عن الخوف زايل
افعالهم مبطي ولا هي جديدات = افعال اهلهم بالسنين السمايل
ان عقب الوالد لنسله نحيلات = راكان عقب المراجل نحايل
وخلاف ذا ياراكب فوق زرفات = من ساس هجن محيلات اصايل
هجعات وطنات همام وخفيفات = ولى تنحن مثل فرق الجمايل
حمر وزهاهن دلهن والحمارات = وصف اللميع ولا خلطهن همايل
ما يوم مس رقابهن خيزرانات = ولا رقعوا خفافهن بالنعايل
لا روحن بعصير مثل النعامات = ولا قطوات واردات لثمايل
معهن دليله صاحي الفكر ما بات = حزب عليهن عن طريق الخمايل
خمسة عشر يوم نهار وليلات = يسري الليل وياصله بالقوايل
يلفن لشيخ منزله بالحمادات = من عقب ما هو نازل بالسلايل
يهلي بهن راكان بقبال واقفات = عنده قراهن من سمان الجزايل
الوجه مسفر والنواظر فضيات = مانقل هم الكيل يوم المكايل
ستة دلال من المهيل مليات = مصروفهن ما هو لك الله قلايل
فنجالهن يغدي عن الراس دوخات = يشبه لدم الجوف يبري العلايل
لا شف منهن شارب الكيف شفات = ينسى الهموم الحاضبة والهوايل
وتلقا المفارش بالرباع العذيات = واللي تبونه جاهز بالكمايل
تريحوا واركابكم مستريحات = في بيت ريف الضيف عز النزايل
في بيت اخو عشوى زبون الونيات = راكان زبن الوانيات الهزايل
شيخ كريم ولا يهاب الخسارات = راكان بن مرشد حميد الخصايل
متلف حلاله ما حسب للجنيهات = والنوق يذبح دقها والجلايل
ماله شغل لكود قلط وقم هات = ويا ما عشاهم من ردوم وحايل
راكان عنوان الصخى والشهامات = الشيخ باعه دوم بالفعل طايل
نعم باخو عشوى معشي المجيعات = الفارس المشهور جزل الفعايل
يعطي جياد الخيل وايضا الالوفات = وعن الكثر والقل ما هو مسايل
شيخ مفاعيله طوال وعريضات = شيخ لفعل الطيب والجود نايل
والنعم بابو طراد عز القصيرات = اللي يسوي للذبايح طوايل
راكان مثل الشط تاتيه حولات = تلقا عليه الناس نازل وشايل
شفت الصياني وصفهن تقل حلات = يندا عليهن صافي الدهن سايل
تلقا عليهن المشاكيل قلطات = تشبع بهن جيرانهم والعوايل
كانه قليل قلوطها حول ميات = هذا الوكاد ويشهدون الحمايل
وصينيته يرجع بها الزاد لا بات = يلقا بطراف البيت مثل النثايل
فعايله على النشاما عسيرات = ما نالهن هل اليدين البخايل
ما هي كرامه واحد بالفضاوات = وان ظيم ضاقت به جميع المحايل
صدوق امين ولا يبوق العهادات = ولا طاع مشوره خباث العمايل
ولا دار في ربعه عوايز وهزعات = ولا هو من اللي يفتقون الخلايل
وان جاه منيوب يدور العطيات = يبشر بعزه من كثير الفضايل
ما هو على الدنيا كثير الحسافات = يعطي ولا قصده يدور الجمايل
احلا من الشهد المصفى بكاسات = وامر من العلقم الى شاف عايل
ممشاه عدل ولا يداني العواجات = عدله يعدل كل من كان مايل
راكان مقدام الجموع الثقيلات = الحيص شيال الحمول الثقايل
ابو طراد اللي علموه بعيدات = الشيخ كساب الفخر والنفايل
مقدم هل العرفا سنين قديمات = شيخ مصيت من صناديد وايل
معروف فعله بالحضر والبداوات = علمه تنومس به جميع الحمايل
هذي فعول الشيخ ماهن خفيات = فعله تسولف به شخوص القبايل
عدت فعول الشيخ مثل الامانات = رد الوداعة دفعهم للعدايل
حطاب ولف من جزيلات الابيات = ما هو كلام اهل القلوب الهبايل
وختمتها بالله ولا قلت زلات = ولا قلت لكود الصحيح الصمايل


.
جميع الحقوق محفوظة © 2016 الراوي – سالفة وقصيد.