قصيدة عبد الله بن عباس الدكنان


قصيدة عبد الله بن عباس الدكنان
الراوي عبدالله بن دهيمش بن عبار


وهذه القصيدة من نظم عبد الله بن عباس بن دكنان الشعلان في نسب أسرة الشعلان مشايخ قبايل الرولة يقول :

مبداي بالرحمن ربٍ وحيدي = خلاق سبعٍ عاليه دون عمدان
ومن بعد ذلك نبتدي بالقصيدي = ولاني على نظم التماثيل شفقان
لاشك أنا من واجبي يا عضيدي = قصدي أسجل شجرة لنسل شعلان
متحري الدقة بكل اتعديدي = عن قولةٍ بالشرح قاصر وطولان
شعلان عقب سبعةٍ بتحديدي = غرير ودقية وجابر وروضان
وعياله الباقين جعلك تفيدي = سالم ومعه فنيخ وأيضاً سليمان
وغرير ابو عشره ومية حفيدي = عقب ابطالٍ باللقا شانهم شان
منيف ومعبهل وأيضاً هنيدي = وصبيح وبنيه ومعهم شبيعان
ومنيف شيخ رويل باسه شديدي = شيخ لعموم رويل من قدم الأزمان
من عياله عبدالله ولا هو وحيدي = معه جبل والنعم والله بالأخوان
وعيال عبدالله رجال الحميدي = نايف ومجول مع زيد الآذان
خيولهم عن الخطر ما تحيدي = أبطال نسل أبطال تاريخهم بان
نايف يروس رويل رايه سديدي = صاروا مواريثه مشايخ وشجعان
فيصل ومعه هزاع مع الحفيدي = سطام لطام العدا يوم الأكوان
وعيال جبل هم خزام العنيدي = وجبل عياله نجم أيضاً ودكنان
ولا الدريعي راح علمه بعيدي = لا سار يتلونه على الخيل فرسان
لعيون حصه ما نطيحه سعيدي = والخيل ما تلاه مهرة ولا حصان
لعيون حصه ما يعيش الوليدي = عافوه لو أنه سلايل كحيلان
نايف والدريعي ذكرهم ما يبيدي = شعار شمر مجدوهم بقيفان
ومجول من الفرسان فعله فريدي = زيزوم ربعه يوم روغات الأذهان
وشجرة نسبنا جعلها للمزيدي = نفخر بها من دور وايل إلى الآن
وغاية رجايه أن قولي يفيدي = ولف لنا الصايغ وموزل ورضوان
ومولفين من زمان بعيدي = ولف لنا وليم ولا قال بهتان
وصلاة ربي عدد رمل الصعيدي = على النبي الهاشمي نسل عدنان


.
جميع الحقوق محفوظة © 2016 الراوي – سالفة وقصيد.