قصيدة للشاعر حابس بن منسي الرويلي


قصيدة للشاعر حابس بن منسي الرويلي


قصائد لشعراء معاصرين مسنده على عبدالله بن دهيمش بن عبار


وهذه القصيدة قالها الشاعر حابس بن منسي بن سعد الأشقر الربشاني القعيقعي الويلي يسند على عبد الله بن دهيمش بن عبار فيقول :

بديت بسم الله علام الأسرار = سبحانه اللي عالم بالخفيه
و من بعد ذكر الله نظمت الأشعار = من منبع بالجوف يطري عليه
يا راكب اللي كان حرك مع القار = لا ركبه السواق تسمع دويه
من نوع جمس ولا يثمن بالأسعار = يطوي بعيد القاع بيوم اضحويه
من عندنا مرسول يم أبن عبار = بسلام من عندي بمية تحيه
من لابة بالحرب تدوس الأخطار = عدوهم بالكون تنزف ادميه
يوم أن دور السيف حماية ابكار = يوم أن بعض الناس يترك خويه
تاريخهم معروف للناس تذكار = أهل الصخى والطيب وأهل الحميه
واربوعك الويلان كان الدخن ثار = الكل منهم بالملاقا قضيه
سبعه ورويلات وعيال عمار = الكل منهم ما يهاب المنيه
والنعم بالفدعان بواجت الدار = أهل العلوم الطيبه والعذيه
واللي يصوت بالعشا لكل مرار = صوت به أبن مهيد ما هي خفيه
وعيال وايل من قديم لهم كار = أيام عصر السيف والبندقيه
ولا بزمان اليوم ما ضلت أخطار = تلقا الوحش مفلاه مع الشليه
اليوم صار البس ما يقرب الفار = الكل منهم هايب من خويه
صار الرخم و البوم في عال الأوكار = و الحر الأشقر طاح وسط الهبيه
وشفنا كثير المال تتليه الأنفار = وصار الضعيف اليوم هو الضحيه
ثم الصلاة اعداد ما تنزل امطار = و عد النبات و عد حصو البنيه


.
جميع الحقوق محفوظة © 2016 الراوي – سالفة وقصيد.