قصيدة للشاعر خالد بن صتان بن فدغم الرويلي


قصيدة للشاعر خالد بن صتان بن فدغم الرويلي


قصائد لشعراء معاصرين مسنده على عبدالله بن دهيمش بن عبار


وهذه القصيدة الفريدة قالها الشاعر خالد بن صتان بن فدغم الرويلي يمجد بعض نوادر ربعه ويسند على عبد الله بن دهيمش بن عبار فيقول :

بسم الذي فرض علينا الصلاتي = وصوم رمضان و حج بيت له أركان
و شهادتين سابقات و زكاتي = وصى عبيده بالفضيله و الإحسان
الخالق الرازق عظيم الصفاتي = اللي ذكر بالكتب يوسف ولقمان
الله يكافينا الغلط و الشماتي = و يضفي علينا الستر في كل الأحيان
و من بعد هذا صغت منطق ابياتي = بربوعنا اللي بالملازيم مزبان
يخطون لكن بالمفالي احماتي = تزعل ويرضونك إلى صرت بلشان
معير يضفي للجميع العباتي = يرفى الخمال و مقدم يوم الأكوان
وشرف عقيد و تتقيه الرماتي = ورفاد صال وجال في كل ميدان
و العنتري شهم وسيع اطعناتي = مقدام ربعه يوم للخيل فرسان
وصحن مضيفه بالدفى و المشاتي = ناره توهج و المناسف لها شان
ونعم بأبن فدغم عطيب الهوايت = اللي نهار الكون يروي شبا الزان
ولا ينجحد فعل الجميشي وشاتي = وفدعان أخو طرفه ولحية عبيثان
وسحم نهار الكون شرس زناتي = و أكرم جناب إلى لحقت بالجويعان
و أخو شقا مسواط بقعا و عاتي = و شايع و أبو مسلم و دايل وجدعان
و عسكر حشيهم وروع النأيحاتي = جض القطين لغيبته ذرب الأيمان
وسندا ورايس و اللحى المكرماتي = و تعب و مخسر و أخو سعدى و حران
و عبد عزيز النفس حسن السماتي = وخطيبنا وقاعد و ماطر و ريشان
و طاحوس ما هاب الفزع و العداتي = بناخيه جابه يوم روغات الأذهان
مدحت و الفندي للافراح يأتي = يمناك لامنه غشى الجو دخان
و أمدح معاشي راعي الطايلاتي = بالعرف يصلح بين ربعه و الأخوان
و عبلوك يكرم لا لفوه السراتي = ممدوح لو أنه تنحى بالأوطان
وصالح خميس القرم جزل الشواتي = و مركي ولافي و أبو مشعل و فرحان
و محمد الملفي على الواجباتي = و على أبن مسفر يوم للطيب ربان
و مسلم عزيز ولا نهجره بتاتي = رفيقنا بين القطينين حيران
و على أبو تركي باللقا له قناتي = و بالغيض ما يبعد من أول إلى الآن
أسنينهم بأمجادهم حافلاتي = بيضا ولا قالوا تقل ريش غربان
مثايل عندي عليهن اثباتي = ولا قلتها اجامل بها فلان وفلان
ولا قلتها بأوصاف غر البناتي = ولا مقصدي فيها للي غير حقران
الغانمين علومهم هي شفاتي = منا و عنا ما حظينا بها انسان
ندرى الرفيق ولا نحب الشناتي = وإلى بلغت ما همنا كاين كان
قصدت و الشعار سوت اسواتي = تمدح و تصلح بالقبيله و لا تدان
و الفضل لله ما سعيت بشتاتي = ودي بلم الشمل في قدر الأمكان
وسبقني النجدي بجزل الوصاتي = مقحم شهرها شيخة له ابقيفان
يمنا بلا يسى تعسرها الحصاتي = وش عاد لو هي من مشاميخ ضلعان
ولا طار طير ولا رمى الطيباتي = لو ما الولي معطيه ريش و جنحان
و عبد الله ألف من رزين الرواتي = أنساب وايل بالمواقع و الأزمان
نرفع له البيضاء على النايفاتي = أديبنا يكرم جنابه و ينصان
من لابة بالطيب مثل الفراتي = قصيرهم يحشم جنابه ولا ايهان
لابة مصوت بالعشى بالمباتي = هده ورده و العطيه بلا اثمان
و ما قل دل ولا نحب الهتاتي = و العذر كان أنه حصل أي نقصان
و ترى الكمال لعالم الخافياتي = اللي رفع عن أمته كل نسيان
و العمر قافيه الفنا و المماتي = لو دامت الدنيا رئيتم سليمان
الحشر تاقف به حقاة عراتي = الكل يطلب سامك العرش غفران
يوم مخيف و يذهل المرضعاتي = يسكر به المخلوق من غير سكران
ترجف قلوب الناس تبي الثباتي = فيها العرق يلجم إلى فوق الأمتان
ألا أهل الخيرات و المحسناتي = عن هولها في ضل خالق ورحمن
يشفع لها محمد عليه الصلاتي = بأمر من المولى ورحمة ورضوان


.
جميع الحقوق محفوظة © 2016 الراوي – سالفة وقصيد.