من شعر الشاعر خليف النبل الخالدي


من شعر الشاعر خليف النبل الخالدي
الراوي عبدالله بن دهيمش بن عبار


أما الشاعر خليف النبل الخالدي من قبيلة بني خالد المعروفة فهوشاعر مشهور وقد أمضى جل حياته مع قبيلة عنزة وله قصائد في مدح بعض مشايخ عنزة التقيت به ونقلت عنه وقد تكرم فاهدى لي شريط مسجل بصوته من شعره ونشرت له عدد من القصائد في طبعة سابقة في أحد مؤلفاتي ومن شعره هذه القصيدة يمدح الشيخ عبدالعزيز الباشة شيخ قبائل بني خالد في الشمال فيقول : ‏

يا عيال ياللي راكبين على كوم = توقفوا يا عيال عندي وصيه ‏
وصية لشيوخ ما هي لهذلوم = زمول التخوت شبولة الشومريه ‏
تلفون بيت كنه الحيد مزموم = بيت الصخى بيت الندا والحميه ‏
عبدالعزيز الهيلعي ناطح الروم = على الزعامه دون كل البقيه ‏
الجوهر المكنون مسقى ومسموم = بتار قصاص العظام القويه ‏
تلقون عنده جالسين على الدوم = عيال ناصر دوم مثل الحنيه ‏
قولوا لهم لا يا فزع كل مظيوم = عوق الخصيم اليا زما وزاد غيه
أنتم لنا شيخان مبطي إلى اليوم = وأنتم ذرانا بالبيوت الذريه ‏
أنتم ذرانا يا ذرى كل مهموم = وأنتم لنا ترسون في كل هيه ‏
أنتم مقر الجود وكلن له اسلوم = واعلومكم بالجود ما هي خفيه
عاداتكم بالجود والرزق مقسوم = متوارثين الطيب ما هو حذيه‏
عبدالكريم الباش تدعي به القوم = وأبو الهدى الحلحيل راعي التكيه ‏

وقال خليف النبل الخالدي يمدح الشيخ راكان بن مرشد شيخ قبيلة السبعة :

البارحه مضيت ليلي تفاكير = عيوني لذيذ النوم ما يقبلنه ‏
مالي على تنويم عيني مقادير = كليت أحاول نومها بدون فنه ‏
خلاف ذا شديت هجن مجاسير = وامضريات للسرى يبخننه ‏
يرعن زهر نوار عشب المعاصير = الياما كمل مرباعهن ما اقصرنه ‏
وامرودمات دفوفهن كالقناطير = حيل وثلاث سنين ما لافخنه
لوحوا عليهن يا حماة الغنادير = بستر الولي مقصودهن يوصلنه ‏
خوذوا عليهن يالنشاما مشاوير = أن ما اهرفن بالدرب ما يقطعنه ‏
وإلى لفيتوا بيت ريف الخطاطير = عنده تنال انفوسكم ما بغنه ‏
فنجال يقنع شاربينه عن المير = قبلي فهد بالفايته قال عنه ‏
عندابن مرشد ريحوهن عن السير = لاذن بحماه وزابنات نصنه ‏
يا شيخ والله ما زبنتك عن الغير = وأنت الذي ينصاك من غربلنه ‏
شيخ كبير وبك شهامه وبك خير = واللي يظن بغيركم خاب ظنه ‏
عاداتكم يا شيخ كسر الطوابير = إلى اعتليت مكاضمات الأعنه
أفعالكم تشهد عليها المناعير = نلتم دروب المجد من غير كنه ‏

ومن شعر خليف النبل هذه القصيدة يسند على الشيخ طراد بن عارف الهديب ويتوجد على قرب الموايقة فيقول :

يا اهل الونيت اللي نويتوا تمدون = ترفقوا بالهون لا تمحنونه ‏
إلى مشى ممشاه خلوه بالهون = وإلى تعلوى القار لا ترحمونه ‏
إلى تعلوى القار ممشاه بجنون = وإلى همزته بالقدم زاد كونه ‏
تلفون للي لا لفيتوا يهلون = ياخذ ثلاث أيام ما تعتلونه ‏
كلن يقول بجيرتي ما تعدون = تالي نهار وشفكم تاصلونه ‏
تلفون أبو فرحان بالطيب مبخون = عنده تنال انفوسكم ما تبونه ‏
واليا لفيتوا فالكم حين تلفون = كبش مربى لأجلكم يذبحونه ‏
ياطراد طيبك ياأبن الأجواد مظمون = أنتم جدار الطيب وانتم حصونه ‏
الجود عقب اجدود من خلقت الكون = أنتم مقر الجود وانتم زبونه ‏
هذا لكم موروث والناس يدرون = من دور فارس لين فرحان دونه ‏
يا أخوان نقوى ما بكم شك وأظنون = ما أحدٍ خبر بعموقكم صار بونه ‏
أقولها والناس مثلي يقولون = الناس فعل الطيب ما ينكرونه ‏
عند العرب للضيف سلم وقانون = قبل ثلاث ايام ما ينشدونه ‏
لا شك كان أنه نشدكم تهرجون = باللي حصل وأوضاعنا تبخنونه ‏
لا شافكم بالدرب من حين تأتون = يبدي يرحب قبل ما تعلمونه
‏لو أمدحه بالطيب وانتم اتخبرون = لا بد عقب مسياركم تعرفونه ‏
قولوا لأبو فرحان يا شيخ تكفون = اللي قعد بالمرح لا تتركونه ‏
تنعاف لو ينبت بها اثمار واسعون = نمشي على الأقدام ما ابغي نمونه ‏
من دونكم الدرب ما هو بمامون = عسى عكاش دروبنا تسهلونه ‏

وقال خليف النبل هذه القصيده من الهجيني يسند على الشيخ سوعان بن هديب فيقول :

العام وين وهلحينه وين = طال المدى وأبعد الميدي ‏
يا لابتي وين أنا وهلحين = ما صح لي شوف ما ريدي ‏
الوقت يمضي عطاه الشين = يا قشر بعد المحاميدي ‏
لا هنت قم شد لي يا حسين = من فوق اللي تقطع البيدي ‏
نبي نترادف عليها اثنين = ولا التواجيد ما تفيدي ‏
طريقنا ما يبي تبخين = يصيح باسم العواويدي ‏
حط المحزم يسار شوين = واقطع سلاحيب لا تعيدي ‏
ترى المعزب اقبال العين = بيّن ما يبي تناشيدي ‏
ملفاك وجه الندا نعمين = سوعان نسل الأجاويدي ‏
بيته اكسوره تقل ضلعين = بيته مخومس تقل حيدي ‏
كل يوم لضيفه يزود بزين = تجدد بالطيب تجديدي ‏
نقيم ما هقوتك عجلين = مامن اشكوك ومناقيدي

ومن شعر خليف النبل الخالدي هذه القصيدة يثني على الشيخ صلبي بن شتيوي شيخ السحيم من القمصة من السبعه فيقول :

قم يا نديبي شد حرٍ بكوره = حرٍ هميم من النضى طيب الساس ‏
بعيد كوعه حيل عن نوش زوره = يشدا زعوج الريح لاهب نسناس ‏
خذ الجواب ولا بقولي ضروره = لا قيل وسط رجال تفكر به الناس ‏
قرايض لخليف من راي شوره = كلام فاهم يجمع الهرج بسياس ‏
تلفي لبيت نابيات اكسوره = تلقا النشاما والمناعير جّلاس ‏
سلم على اللي باللوازم انموره = فرسان لا ركبوا على قب الأفراس ‏
يوم المراجل والفعول امخبوره = يتلون أبو عبكي إلى صار لولاس ‏
يرعى قفر ما جاه الا العفوره = قفرٍ مكانه خوف ما طبه أوناس ‏
ولا العدو عاداتهم شل خوره = يثنون بالضيقات والعج محتاس ‏
يجذبك صوت انجورهم فج نوره = حس المهاون كنها بسوق نحّاس ‏
يفوح ريح الهيل لا زان فوره = فنجال بنه يجلي الهم واعماس ‏
وامنولين الجار شي يدوره = زين النبا والقدر للجار نوماس ‏
ولا دوروا في غرت الجار عوره = ولا يشتكي منهم ملامه وهوجاس


.
جميع الحقوق محفوظة © 2016 الراوي – سالفة وقصيد.