من شعر علي الدريعان المهيدي


من شعر علي الدريعان المهيدي
الراوي عبدالله بن دهيمش بن عبار


أما الشاعر علي الدريعان المهيدي فهو شاعر له الكثير من القصائد ومن شعره هذه القصيدة قالها بالشيخ النوري بن مقحم بن مهيد :‏

أمس الضحى نطيت في راس مرقاب = ورجلي تعدي فوق راس الطويله ‏
أضحيت بالعبرات والصدر ما جاب = قامت تجارى من ضميري عويله ‏
اليا كبى حظ الفتى والسعد غاب = تاجب عليه من المناحات ويله
فكرت بالدنيا تقل برم دولاب = وذكرتها في كل جيل بجيله
ما دامت لسلطان وعقاب وحجاب = مع نمر أبن عدوان هو والحليله
صفقت بالكفين وعضيت بالناب = على المحلا ما يحلا بمثيله
يوم أتذكر باشقر الأريش حطاب = الصارم اللي ما يصيد الهجيله
مثل القطامي لا سمع حس نعاب = يضرب ضلاله بالبحر تستوي له
النوري ذرانا وسترنا عند الأجناب = هو الذي عنا نطح كل عيله
يزمر مثل نمر وراء الهيش بالغاب = نمرٍ بوسط حماه محد يجي له
شيخ دياره ما عطاها هل الباب = وزودٍ على حمل المقصّر يشيله
هي عشقته لو عرضت فيها الأسباب = أيضاً ولا تزهى لغيره حليله ‏
الله من راس عذبه صفق الأوجاب = وعيني اللي صايبتها غليله ‏
وجر قلبي جرت الحبر بكتاب = عود اليرا بخط المعلم مشيله ‏
عيا الطبيب يعالج أمراض الأطباب = دوّر دواه ولا لقا فيه حيله ‏
الجرح لا غمض على الداي ما طاب = طول المدى يلحق ويقتل عليله ‏
الا عن المعبود فتاح الأبواب = الخير اللي كلنا نلتجي له ‏
فرحوا بنا شم العدا هم والأصحاب = وصارت علينا يا أبو ثامر سحيله ‏
جرى علينا من عواريض الأسباب = من ظيم جور مولعين الفتيله ‏
تسكرت بوجيهنا كل الأبواب = ولا عاد فيها اليوم حيل وحيله ‏
جانا خبركم من ورا المات وأصواب = أيسر من الرطبة محاري أبيله ‏
العين ترعى الشيوخ والشيوخ غيّاب = أنور ومقحم زبن من طاح شيله ‏
هم خلفتي بالصيرمي شاطر الناب = الشبل قواد الجموع الثقيله ‏
النوري اللي للمعادين قصّاب = تاريخ أربع بينت له فعيله ‏

وقال علي الدريعان هذه الأبيات من قصيدة بالشيخ النوري بن مهيد : ‏

يا الله يا رفاع سبع السموات = يا حي يا قيوم مفتوح بابك ‏
ضاقت علينا ولا بقابه مراوات = ولا خيرٍ نرجيه سوى جنابك ‏
متى تعيد سهيل زبن الونيات = يا اللي بكل الواجبات انهقابك ‏
الهيلعي مهدي الجمال المنيبات = لا هدت القعدان تصرك انيابك ‏
يا النوري بن مهيد نسيت ما فات = وصار العداوة من أداني احبابك ‏
حزنت عليك البيض والدار وأبيات = وحتى السبايا حزنت من غيابك ‏
ما هو بشوف العين ذكر امبالات = أحذر تجر العود وأحفظ كتابك
اللي يسجل كلمتك بسطوانات = واللي يذيع الراديوا في خطابك ‏
واليوم ضيف يم بلاد العمارات = صرت بطريق الناس كلن حكابك ‏

ومن شعر علي الدريعان هذه الأبيات من قصيدة لم نعثر عليها كاملة يقول ‏:

دوره يا عقوب ببلوف المكينه = حلوا مرواح البيوك بلا كراسي ‏
قولوا للفدعان ياللي ناحرينه = سولفوا للولد وأحكوا للرواسي ‏
سولفوا للي الحرايب مشتهينه = صابرين بين شمر والجلاسي ‏
شيخنا يوم اللقا عاشت يمينه = يرحم عود عقب الشيخ السياسي ‏
بالقبايل ما أحدٍ يعرف دفينه = يفهم المقصد ويكتب بالطلاسي

ومن شعر علي الدريعان هذه الهجينية يتوجد على الشيخ خليل بن حاكم المهيد بعد أن رحل من ديرته وسكن في دومه حيث يقول :

قمت اتلزى ولاني لازي = ورقيت أنا راس مرجومه ‏
وجدي على القرم أخو جازي = عمّر قصور وسكن دومه ‏
يا زبن من جاه متوازي = طيبه مع البدو وحكومه ‏
له هدة هدها غازي = وأن فرعت كل شغمومه ‏
متفهق كنه البازي = عليه حلياه ورسومه


.
جميع الحقوق محفوظة © 2016 الراوي – سالفة وقصيد.